Pokistonda boʼlib oʼtgan xalqaro turizm festivalida Oʼzbekiston milliy poviloni namoyish etildi

Joriy yilning 6-8-noyabr kunlari Pokiston poytaxti Islomobodda boʼlib oʼtgan «Pakistan Tourism, Sports & Family Festival 2026» xalqaro turizm festivalida Oʼzbekiston milliy pavilьoni tashkl etildi.
Turizm, madaniyat, sport, gastronomiya, hunarmandchilik va oilaviy-koʼngilochar xizmatlar kabi yoʼnalishlarini birlashtirgan ushbu xalqaro festivalda Pokiston hududlari bilan bir qatorda xorijiy mamlakatlar diplomatik vakolatxonalari, turizm tashkilotlari va aviakompaniyalar vakillari ishtirok etdi. 
Oʼzbekiston milliy pavilьoni oʼzining oʼlchami, milliy ruh va zamonaviy taqdimot uslubini uygʼunlashtirgan bezagi, mazmunan boy ekspozitsiyasi hamda mehmondoʼstlik muhiti bilan alohida ajralib turdi. 
Xususan, yurtimiz pavilьonida mamlakatimizning ziyorat, madaniy, gastronomik, tibbiy, ishbilarmonlik va MICE-turizm salohiyati, turistik infratuzilma, zamonaviy xizmatlar hamda sayyohlik manzilgohlari keng targʼib qilindi. Samarqand, Buxoro, Xiva, Toshkent, Qoʼqon va boshqa hududlarning boy tarixiy va madaniy merosi, tabiati va ziyoratgohlari aks etgan materiallar namoyish etildi.
Pavilьonda, shuningdek, «Made in Uzbekistan» maxsus koʼrgazmasi tashkil etilib, unda milliy hunarmandchilik va amaliy sanʼat namunalari, oʼzbek milliy liboslari, cholgʼu asboblari va madaniyatimizni aks ettiruvchi turli mahsulotlar joylashtirildi. 
Oʼzbekiston pavilьoniga Pokiston rejalashtirish, rivojlanish va maxsus tashabbuslar federal vaziri Аhsan Iqbal, axborot va radioeshittirish vaziri Аttaullah Tarar, temir yoʼllar vaziri Hanif Аbbasi, Pokiston Bosh vazirining turizm masalalari boʼyicha maslahatchisi Sardar Yasir Ilyas Xan, Pokiston Turizmni rivojlantirish korporatsiyasi rahbari Аftab Ur Rehman Rana tashrif buyurdi.
Rasmiy mehmonlar Oʼzbekiston Prezidenti Shavkat Mirziyoev rahnamoligida yurtimizda turizmni rivojlantirish borasida amalga oshirilayotgan yangilanishlarni yuksak baholadi. Shuningdek, ular Oʼzbekistonning mazkur jabhadagi tajribasi boshqa mamlakatlar uchun namuna ekanligilini taʼkidladilar. 
Pokiston tomoniga pavilьon kontseptsiyasi, sayyohlik yoʼnalishlari va ekspozitsiyalar haqida batafsil maʼlumot berildi. Shuningdek, elchixona tomonidan nashr etilgan «Uzbekistan in Photos: A Journey Through the 14 Regions» nomli maxsus kitob hamda mamlakatimiz hududlarining investitsiyaviy imkoniyatlariga bagʼishlangan «Uzbekistan: Regions of Opportunities. From Silk Road Legacy to the Next Frontier of Growth» qoʼllanmasi sovgʼa qilindi.
 Bundan tashqari, Oʼzbekiston boʼlimiga kelgan mehmonlar oʼzbek milliy liboslarini kiyib fotosuratlarga tushdi, milliy taomlarimizdan tatib koʼrdi, mamlakatimiz tarixi, madaniyati, sayyohlik manzilgohlari va ularning imkoniyatlari haqidagi savollariga javob oldi.
Tashrif buyuruvchilar oʼrtasida maxsus interaktiv oʼyin tashkil etildi. Unda gʼolib boʼlgan 6 ta ishtirokchiga Oʼzbekistonga bepul sayohat yoʼllanmalari taqdim etildi.
Tadbirning ishbilarmonlik dasturi doirasida mamlakatimiz diplomatlari Pokiston va boshqa davlatlar turkompaniyalari vakillari bilan turizm sohasidagi hamkorlikni rivojlantirishga qaratilgan qator uchrashuvlar oʼtkazishdi.
Tashkilotchilar maʼlumotiga koʼra, festivalь maydonida 500 dan ortiq koʼrgazma va savdo pavilьonlari tashkil etildi. Ularga uch kun davomida 1 milliondan ortiq mehmon keldi.