Islomobodda Oʼzbekiston va Pokiston oʼrtasidagi ikki va qoʼp tomonlama hamkorlik masalalari muhokama qilindi

Oʼzbekiston elchisi Аlisher Toʼxtaev Pokiston Tashqi ishlar vazirining oʼrinbosari, ShHT ishlari boʼyicha milliy koordinator Xalil Hashmi bilan uchrashuv oʼtkazdi.

Muzokaralar avvalida Oʼzbekiston va Pokiston munosabatlarining bugungi holati, ularni yanada rivojlantirish istiqbollari, oliy darajada erishilgan kelishuvlarning ijrosi va ShHT doirasidagi hamkorlik masalalari muhokama qilindi.

Tomonlar mintaqadagi joriy vaziyat, uning mintaqaviy xavfsizlik, savdo-iqtisodiy hamkorlik hamda Markaziy va Janubiy Osiyo oʼrtasidagi transport bogʼliqligiga taʼsiri yuzasidan fikr almashdilar.

Mintaqaviy muammolarni hal etish Markaziy va Janubiy Osiyo oʼrtasidagi oʼzaro bogʼliqlikni mustahkamlash uchun muhim ahamiyat kasb etishi taʼkidlandi.

Xalil Hashmi Oʼzbekiston va Pokiston oʼrtasidagi ikki tomonlama va koʼp tomonlama hamkorlikni, barqaror siyosiy muloqotni hamda oliy darajadagi ishonchli aloqalarni alohida qayd etdi. Uning aytishicha, savdo-iqtisodiy, transport, turizm va hududlararo hamkorlikni oʼz ichiga olgan deyarli barcha yoʼnalishlarda ijobiy surʼat kuzatilmoqda.

– Oʼzbekiston Prezidenti Shavkat Mirziyoev rahbarligida yurtingizda amalga oshirilayotgan keng koʼlamli oʼzgarishlar, jadal iqtisodiy taraqqiyot va izchil islohotlar Markaziy va Janubiy Osiyo oʼrtasidagi bogʼliqlikni taʼminlashda ham muhim ahamiyat kasb etmoqda, – dedi Pokiston TIV rahbari oʼrinbosari. – Shuningdek, Oʼzbekiston va Pokiston oʼrtasidagi tarixiy va madaniy aloqalar ikki tomonlama munosabatlarni mustahkamlashga xizmat qilmoqda.

Muloqot chogʼida Pokistonning ShHTga raisligi davrida belgilangan boʼlajak tadbirlar, shuningdek, joriy yilda oʼtkazilishi rejalashtirilgan qoʼshma tadbirlar rejasi ham muhokama qilindi.

Uchrashuv yakunida tomonlar Oʼzbekiston va Pokiston oʼrtasidagi hamkorlikning barcha yoʼnalishlari boʼyicha faol muloqotni davom ettirishga kelishib oldilar.