Toshkent va Shri-Lankaning Mattala shaharlari oʼrtasida ilk toʼgʼridan-toʼgʼri aviaqatnovlar yoʼlga qoʼyildi

Oʼzbekistonning xususiy «Centrum Air» aviakompaniyasi tomonidan Toshkent va Shri-Lankaning Mattala shaharlari oʼrtasida ilk toʼgʼridan-toʼgʼri aviaqatnovlar yoʼlga qoʼyildi.

Mazkur aviaqatnovlar Oʼzbekistonning Shri-Lankadagi elchixonasi (qarorgohi Islomobod shahrida joylashgan) va «Centrum Air» aviakompaniyasining Shri-Lankaning tegishli tashkilotlari bilan olib borgan samarali muzokaralari natijasida amalga oshirildi.

«Centrum Air» aviakompaniyasi samolyoti 28 oktyabr kuni mahalliy vaqt bilan soat 17:30 da Mattala shahridagi Rajapaksa xalqaro aeroportiga 160 nafar yoʼlovchi bilan muvaffaqiyatli qoʼndi.

Mattala Rajapaksa xalqaro aeroportida ilk parvoz tantanali ravishda, xalqaro aviatsiya tartib-taomillariga muvofiq, suv arkasi orqali kutib olindi va rasmiy marosim tashkil etildi.

Tadbirda soʼzga chiqqan Shri-Lanka vakillari «Toshkent–Mattala–Toshkent» yoʼnalishi boʼyicha ilk toʼgʼridan-toʼgʼri aviaqatnovlar yoʼlga qoʼyilgani uchun samimiy minnatdorlik bildirdi.

«Toshkent–Mattala» yoʼnalishi boʼyicha parvozlarning yoʼlga qoʼyilishi Oʼzbekiston va Shri-Lanka oʼrtasidagi transport aloqalarini rivojlantirish, mintaqaviy bogʼliqlik tashabbusi doirasida savdo, investitsiya va turizm sohalaridagi mavjud salohiyatdan toʼliq foydalanish hamda uni yanada kengaytirish borasida amalga oshirilayotgan ishlarning amaliy natijasi boʼldi. Shuningdek, ushbu aviaqatnovlar Oʼzbekiston orqali Markaziy Osiyo mamlakatlari va Shri-Lanka oʼrtasida qulay, tezkor va xavfsiz havo yoʼlini shakllantirishga xizmat qiladi.

«Toshkent-Mattala-Toshkent» yoʼnalishi boʼyicha toʼgʼridan-toʼgʼri aviaqatnovlar 2027 yil mart oyi oxiriga qadar haftasiga ikki marta – chorshanba va shanba kunlari amalga oshiriladi.