O‘zbekiston Prezidenti Saudiya Arabistoni Valiahdi bilan telefon orqali muloqot qildi
O‘zbekiston Respublikasi Prezidenti Shavkat Mirziyoyevning Saudiya Arabistoni Podshohligi Valiahdi, Vazirlar Mahkamasi Raisi Muhammad bin Salmon Ol Saud bilan telefon orqali muloqoti bo‘lib o‘tdi.
29-mart kuni O‘zbekiston Respublikasi Prezidenti Shavkat Mirziyoyevning Saudiya Arabistoni Podshohligi Valiahdi, Vazirlar Mahkamasi Raisi Muhammad bin Salmon Ol Saud bilan telefon orqali muloqoti bo‘lib o‘tdi.
Suhbat avvalida ikki mamlakat yetakchilari bir-birlarini o‘tgan Ramazon hayiti – Iyd al-Fitr munosabati bilan yana bir bor samimiy qutladilar.
Yaqin Sharq mintaqasida kechayotgan keskin vaziyat, qarama-qarshiliklar tobora avj olayotgani tomonlarni jiddiy xavotirga solayotgani qayd etildi.
Bunday xatti-harakatlarning kengayib ketishiga yo‘l qo‘ymaslik va ularni to‘liq bartaraf etish nafaqat bu yerdagi davlatlarning manfaatlariga, balki global barqarorlikni ta’minlash maqsadlariga xizmat qilishi ta’kidlandi.
Davlatimiz yetakchisi bunday sinovli kunlarda O‘zbekiston Saudiya Arabistoni Rahbariyati va birodar xalqi bilan birdam hamda yakdil ekanini qayd etib, Podshohlikning vazmin va oqilona siyosatini har tomonlama qo‘llashini bildirdi.
O‘zbekiston Prezidenti hozirda ushbu mamlakatda Umra amallarini bajarayotgan fuqarolarimizga ko‘rsatilayotgan amaliy ko‘mak va yaratib berilayotgan qulay shart-sharoitlar uchun Podshoh Salmon bin Abdulaziz Ol Saud A’lo Hazratlari va Valiahd shahzodaga alohida minnatdorlik izhor etdi.
O‘z navbatida, Muhammad bin Salmon Ol Saud O‘zbekiston Prezidenti tomonidan bildirilgan samimiy xayrixohlik va do‘stona qo‘llab-quvvatlovni yuksak qadrlashini ma’lum qildi. Ikki va ko‘p tomonlama munosabatlarni yangi bosqichga ko‘tarish uchun oliy darajadagi muloqotlarni va muvofiqlashtirilgan qo‘shma sa’y-harakatlarni faollashtirishga kelishib olindi.
O'xshash yangiliklar
Uy-joy qurilishi va urbanizatsiya sohasidagi ishlar hamda ustuvor vazifalar muhokama qilindi
Prezident Shavkat Mirziyoyev raisligida 14-aprel kuni uy-joy qurilishi va urbanizatsiya sohasida amalga oshirilayotgan ishlar, mavjud muammolar va kelgusidagi ustuvor vazifalar yuzasidan videoselektor yigʻilishi oʻtkazildi.
Afg‘oniston Tashqi ishlar vazirligining Strategik tadqiqotlar markazi direktori va uchinchi siyosiy departamenti rahbari bilan uchrashuv to‘g‘risida
2026-yil 14-aprel kuni O‘zbekiston Respublikasi Prezidentining Afg‘oniston bo‘yicha Maxsus vakili Ismatulla Irgashev Afg‘oniston Tashqi ishlar vazirligining Strategik tadqiqotlar markazi direktori va uchinchi siyosiy departamenti rahbari Abdul Hay Kanit bilan uchrashdi.
O‘zbekiston tashqi ishlar vaziri AQSh Davlat kotibi yordamchisi oʻrinbosari bilan uchrashdi
14-aprel kuni O‘zbekiston Respublikasi tashqi ishlar vaziri Baxtiyor Saidov AQSh Davlat kotibi yordamchisi oʻrinbosari Kristofer Kleyn bilan uchrashdi.