Tashqi ishlar vazirligida “O‘zbekiston yosh diplomatlari klubi”ning yig‘ilishi bo‘lib o‘tdi.

19 dekabr kuni O‘zbekiston Tashqi ishlar vazirligida “O‘zbekiston yosh diplomatlari klubi”ning yig‘ilishi bo‘lib o‘tdi. Tadbirda Tashqi ishlar vazirligi rahbariyati, diplomatlar, shuningdek, faol yoshlar ishtirok etdi

Tashqi ishlar vazirining birinchi o‘rinbosari Bahromjon Aloyev yig‘ilganlar oldida so‘zga chiqib, yoshlarga mamlakatimiz tashqi siyosatining ustuvor yo‘nalishlari, O‘zbekiston rahbari tomonidan belgilab berilgan diplom asi va amalga oshirilayotgan izchil ishlar haqida ma’lumot berdi. so‘nggi yillarda mamlakatimizning mintaqaviy va global jarayonlardagi roli tobora ortib borayotgani, nufuzli xalqaro tashkilotlar doirasida ilgari surilayotgan konstruktiv tashabbuslar haqida ma’lumot berildi.

Bundan tashqari, klub a’zolariga diplomatik faoliyatning asosiy jihatlari, kasbiy imkoniyatlari va xalqaro muloqotdagi o‘rni haqida ma’lumotlar berildi. Ayniqsa, “O‘zbekiston yosh diplomatlar klubi” yoshlarda mas’uliyat, vatanparvarlik va professional diplomatik yondashuvni shakllantirishga xizmat qilayotgani alohida ta’kidlandi.

Shu bilan birga, klubning o‘tgan davrdagi faoliyati yakunlari sarhisob qilinib, istiqboldagi rejalar taqdim etildi. Yoshlarning tashqi siyosat sohasiga qiziqishini oshirish, bilim va malakasini oshirishga qaratilgan tashabbuslar muhokama qilindi. Klub Ijroiya kengashining yangi tarkibi tasdiqlandi, uning yangi a’zolariga sertifikatlar topshirildi, 2026-yilga mo‘ljallangan tadbirlar rejasi bo‘yicha takliflar shakllantirildi.