Oʻzbekiston Prezidenti “SOCAR” va “British Petroleum” bilan hamkorlikni rivojlantirish rejalarini muhokama qildi

Oʻzbekiston Respublikasi Prezidenti Shavkat Mirziyoyev 13-may kuni “Oʻzbekiston energetika haftaligi – 2026” forumida ishtirok etish uchun mamlakatimizga kelgan Ozarbayjonning “SOCAR” kompaniyasi bosh direktori Ravshan Najaf hamda “British Petroleum” kompaniyasi rahbariyati Ariel Flores va Jovanni Kristofolini qabul qildi.

Uchrashuvda energetika va neft-gaz sohasida yetakchilardan hisoblangan ushbu yirik kompaniyalar bilan oʻzaro manfaatli hamkorlikni kengaytirish masalalari koʻrib chiqildi.

Energetika sohasidagi kooperatsiya muvaffaqiyatli kechayotgani mamnuniyat bilan qayd etildi. “SOCAR” kompaniyasi Ustyurt platosidagi uglevodorod konlarini oʻzlashtirish loyihasini amalga oshirishda Oʻzbekistonning sherigi hisoblanadi. “SOCAR”ning Oʻzbekistondagi vakolatxonasini ochish toʻgʻrisida qaror qabul qilindi.

Ushbu keng koʻlamli loyihaga “British Petroleum” kompaniyasi qoʻshilganiga yuksak baho berildi.

Neft-gaz sohasida uglevodorod xomashyosini qidirish, qazib olish va chuqur qayta ishlash, neft va neft mahsulotlarini uzoq muddatli yetkazib berishni yoʻlga qoʻyish hamda tarmoq uchun mutaxassis kadrlar tayyorlash boʻyicha qoʻshma loyihalarni ilgari surish muhimligi taʼkidlandi.

Bundan tashqari, Ozarbayjon futbol federatsiyalari assotsiatsiyasi raisi sifatida ham faoliyat yuritayotgan Ravshan Najaf davlatimiz rahbariga 2027-yilda Oʻzbekiston va Ozarbayjonda yoshlar oʻrtasidagi U-20 jahon chempionatini oʻtkazishga birgalikda tayyorgarlik koʻrishdagi koʻmagi uchun minnatdorlik bildirdi.