Madrid shahrida O‘zbekiston-Ispaniya biznes-forumi bo‘lib o‘tdi

2026-yil 7-aprel kuni O‘zbekiston tashqi ishlar vaziri Baxtiyor Saidov Madrid shahrida bo‘lib o‘tgan O‘zbekiston–Ispaniya biznes-forumida ishtirok etdi.

 “Madrid shahrida bo‘lib o‘tgan O‘zbekiston-Ispaniya biznes-forumi ishbilarmon doiralarimiz o‘rtasida amaliy hamkorlikni kengaytirish uchun muhim platforma bo‘ldi, – deb yozdi O‘zbekiston TIV rahbari o‘zining telegram-kanalida. – Energetika, infratuzilma, transport, qishloq xo‘jaligi, qurilish, turizm va boshqa yo‘nalishlarda yangi loyihalarni ilgari surish masalalarini muhokama qildik.

Xususan, “Aries & Leo Equity Holding”, “Future Farm Solutions”, “Almar Water Solutions”, “IMABE”, “KHESH GROUP”, “Banco Santander”, “Water Challenge” hamda “Systemfoc” kabi yetakchi kompaniyalar bilan hamkorlik imkoniyatlarini ko‘rib chiqdik.

O‘zaro manfaatli sheriklik uchun ulkan salohiyat va ko‘plab istiqbolli yo‘nalishlarimiz mavjud bo‘lib, mazkur forum iqtisodiy aloqalarimizni yana-da oshirishga xizmat qiladi.

Ushbu samarali forumni tashkil etishda bizni qo‘llab-quvvatlagan barcha hamkorlarimizga minnatdorlik bildiramiz”.