Pokistonning yetakchi kompaniyalar guruhi Yangi Toshkentda investitsiya loyihasini amalga oshirish imkoniyatini oʼrganmoqda

Oʼzbekiston elchisi Аlisher Toʼxtaev Pokistonning «Zaheer Khan Brothers» («ZKB») kompaniyalar guruhi ijrochi direktori Muhammad Kamran Said Xan bilan muzokara oʼtkazdi.

Uchrashuv Oʼzbekiston Prezidenti raisligida 12-oktyabrь kuni Yangi Toshkent hududiga xorijiy investorlarni jalb etish masalalari boʼyicha oʼtkazilgan yigʼilishda belgilangan vazifalar ijrosini taʼminlash doirasida tashkil etildi.

Tomonlar «ZKB» kompaniyasining Yangi Toshkentni barpo etish loyihasida ishtirok etish imkoniyatlari, shuningdek, uzoq muddatli investitsiyaviy va infratuzilmaviy hamkorlik istiqbollarini muhokama qildilar.

Pokiston vakiliga Yangi Toshkent shahrining rivojlanish kontseptsiyasi va amalga oshirilayotgan ishlar haqida taqdimot namoyish etildi. Unda hududda yoʼllar, muhandislik-kommunikatsiya tarmoqlari, turar joy majmualari, maʼmuriy binolar, maktablar, universitetlar, istirohat bogʼlari hamda boshqa infratuzilma obʼektlarini barpo etish ishlari olib borilayotgani taʼkidlandi. Yangi Toshkentning mamlakatning maʼmuriy, iqtisodiy va ishbilarmonlik markazi sifatida shakllanishi xorijiy investorlar uchun uzoq muddatli va istiqbolli imkoniyatlar yaratishi qayd etildi.

Mazkur yirik loyihada ishtirok etish istagini bildirgan investorlar uchun yaratilgan shart-sharoitlar, jumladan, investitsiya loyihasining turi, hajmi va joylashuvidan kelib chiqib, amaldagi qonunchilik doirasida soliq va bojxona imtiyozlari pokistonlik tadbirkorda katta qiziqish uygʼotdi.

Muhammad Kamran Said Xanning aytishicha, «ZKB» kompaniyasi Pokiston, Saudiya Аrabistoni va boshqa mamlakatlarda avtomagistrallar, koʼpriklar va yoʼl oʼtkazgichlar, tezkor transport tizimlari, metro infratuzilmasi, suv taʼminoti va irrigatsiya tarmoqlari, ijtimoiy infratuzilma obʼektlari, shuningdek, koʼchmas mulk va shaharsozlik loyihalarini amalga oshirish boʼyicha katta tajribaga ega.

– Kompaniyamiz koʼp yillik tajribasi, moliyaviy imkoniyatlari va texnik salohiyatidan kelib chiqib, Yangi Toshkentda transport va muhandislik tarmoqlari, suv taʼminoti va oqova suv tizimlari, turar joy va tijorat majmualari, maʼmuriy hamda ijtimoiy obʼektlarni barpo etishda ishtirok etishdan manfaatdor, – dedi u. – Biz Oʼzbekiston bozoriga toʼlaqonli investor sifatida kirishni maqsad qilganmiz. Dastlabki loyihaning muvaffaqiyatli amalga oshirilishi kelgusida mamlakatingizning boshqa hududlarida ham yirik infratuzilma loyihalarida ishtirok etishimiz uchun zamin yaratadi.

Uchrashuv yakunida «ZKB» delegatsiyasining Oʼzbekistonga tashrifini tashkil etish, shuningdek, Yangi Toshkent direktsiyasi va tegishli tashkilotlar vakillari bilan muzokaralar oʼtkazish, yer maydonlari hamda loyihalarni amalga oshirish shartlarini joyida oʼrganish boʼyicha kelishuvga erishildi.