Pokiston kompaniyasi Yangi Toshkentda yirik koʼchmas mulk va kompleks development investitsiya loyihalarida ishtirok etishi mumkin

Oʼzbekiston elchisi Аlisher Toʼxtaev Pokistonning «IMARAT Group» kompaniyasi rahbari Аkbar Shafik bilan muzokara oʼtkazdi.
Uchrashuv Davlatimiz Rahbari boshchiligida Yangi Toshkent loyihasini amalga oshirish qurilishini jadallashtirish masalalari yuzasidan investor va tadbirkorlar bilan oʼtkazilgan ochiq muloqotda berilgan topshiriqlar ijrosini taʼminlash, shuningdek, Pokistonning yirik developer kompaniyalarini mazkur loyihaga jalb etish maqsadida tashkil etildi.
Dastlab diplomatlar tomonidan Yangi Toshkent loyihasi boʼyicha taqdimot oʼtkazildi. Unda Yangi Toshkent shahri loyihasining mazmun-mohiyati, xorijiy investorlar uchun taqdim etiladigan imtiyozlar va ularni qoʼllab-quvvatlash mexanizmlari haqida batafsil maʼlumot berildi.
Shundan soʼng, tomonlar «IMARAT Group» kompaniyasining Oʼzbekistonda, xususan, Yangi Toshkent hududida yirik koʼchmas mulk va kompleks development investitsiya loyihalarida ishtirokini taʼminlash masalalarini muhokama qildi.
Xususan, pokistonlik investorga ushbu hududda koʼp tarmoqli development loyihasini amalga oshirish taklif qilindi. Loyiha zamonaviy turar-joy majmualari, «Grade-A» toifasidagi ofis maydonlari, savdo va umumiy ovqatlanish obʼektlari, mehmonxona va konferentsiya markazlari hamda zamonaviy jamoat hududlarini qamrab oladi.
«IMARAT Group»ning koʼchmas mulk sohasida raqamli texnologiyalarni joriy etish boʼyicha tajribasi istiqbolli yoʼnalish sifatida qayd etildi.
Shu munosabat bilan, kompaniyaga nafaqat development loyihasini amalga oshirish, balki kelgusida Yangi Toshkentda koʼchmas mulkni boshqarish, sotuv, facility management, raqamli mijozlar xizmatlari va PropTech yechimlarini joriy etish imkoniyatlarini ham oʼrganish taklifi bildirildi.
– Soʼnggi yillarda Oʼzbekistonda shaharsozlik sohasida erishilgan yutuqlar bizni ham hayratga solmoqda, – dedi Аkbar Shafik. –Yangi Toshkent loyihasi ham Oʼzbekiston taraqqiyotini belgilab beruvchi muhim loyihalardan biri ekanligiga ishonchimiz komil. Shu bois, bizda mazkur mega loyihada ishtirok etishga qiziqish paydo boʼldi. Keling, dastlabki bosqichda Oʼzbekistonga tashrif buyurib, Yangi Toshkent loyisi bilan batafsil tanishgan holda, keyingi qadamlarni belgilab olsak. 
Boʼlib oʼtgan muhokamalar natijasida, «IMARAT Group» delegatsiyasining Oʼzbekistonga safarini tashkil etish va dastlabki muhokamalar bosqichini aniq investitsiya kontseptsiyasini shakllantirish bosqichiga olib chiqishga kelishib olindi.
«IMARAT Group» Pokistonning koʼchmas mulk, development va qurilish sohasida faoliyat yurituvchi yirik kompaniyalar guruhlaridan biri hisoblanadi. Kompaniya oʼz faoliyati doirasida koʼchmas mulk developmenti, arxitektura va dizayn, mehmonxona biznesi, qurilish materiallari, koʼchmas mulkni sotish va boshqarish, shuningdek, raqamli koʼchmas mulk texnologiyalari yoʼnalishlarini yagona ekotizimga birlashtirgan.
Guruh tomonidan Pokistonda koʼp funktsiyali majmualar, turar-joy binolari, savdo markazlari, mehmonxonalar, ofis va boshqa tijorat obʼektlarini barpo etish boʼyicha qator loyihalar amalga oshirilmoqda.