Toshkent va Karachi shaharlari oʼrtasida toʼgʼridan-toʼgʼri aviaqatnovlar yoʼlga qoʼyilmoqda

Oʼzbekistonning xususiy aviakompaniyalaridan biri – «Centrum Air» shu yil 3 sentyabrdan boshlab Toshkent va Karachi shaharlari oʼrtasida toʼgʼridan-toʼgʼri muntazam aviaqatnovlarni amalga oshirishni boshlamoqda.
Mazkur tashabbus Oʼzbekistonning Pokistondagi elchixonasi, shuningdek, ikki mamlakatning aviatsiya va transport sohasidagi vakolatli idoralari oʼrtasidagi samarali hamkorlik va izchil saʼy-harakatlar natijasida amalga oshirildi.
Yangi reyslar haftasiga ikki marta – payshanba va yakshanba kunlari bajariladi. «Toshkent–Karachi–Toshkent» yoʼnalishidagi toʼgʼridan-toʼgʼri aviaqatnovlar mamlakatlarimiz oʼrtasidagi transport aloqalarini yanada mustahkamlab, ishbilarmonlar, sayyohlar, talabalar hamda ziyoratchilar uchun safarlarni ancha qulay va tezkor qiladi.
Shuningdek, mazkur yoʼnalish nafaqat Oʼzbekistonni, balki butun Markaziy Osiyo mamlakatlarini Pokistonning muhim port shahri boʼlgan Karachi bilan oʼzaro bogʼlovchi muhim transport yoʼnalishiga aylanishi mumkin.
Taʼkidlash joizki, hozirgi kunda ikki mamlakat oʼrtasida haftasiga jami 6 ta muntazam aviareyslar amalga oshirilmoqda. Jumladan, Toshkent–Lahor yoʼnalishida haftasiga 4 ta, Islomobod–Toshkent yoʼnalishida esa 2 ta reys bajarilmoqda.