Pokiston axborot vaziri bilan tarixiy filmlar yaratish va OАV yoʼnalishidagi qoʼshma loyihalar muhokama qilindi

Oʼzbekiston elchisi Аlisher Toʼxtaev Pokiston axborot va radioeshittirish federal vaziri Аtaulla Tarar bilan uchrashuv oʼtkazdi.
Unda joriy yil fevralь oyida Islomobod shahrida oʼtkazilgan oliy darajadagi uchrashuv yakunlari boʼyicha erishilgan kelishuvlarni amalga oshirish, axborot almashish, televidenie, ommaviy kommunikatsiyalar va media sohasidagi hamkorlikni chuqurlashtirish, shuningdek, qoʼshma filьmlarni suratga olish masalalari muhokama qilindi.
 Ikki mamlakat kinoijodkorlari hamkorligida Zahiriddin Muhammad Bobur hayotiga bagʼishlangan koʼp qismli badiiy-tarixiy filmni suratga olish, Pokistonning yetakchi ommaviy axborot vositalari vakillari uchun Oʼzbekistonga maxsus press-tur tashkil etish, qoʼshma teleloyihalar, videoroliklar va maxsus reportajlar tayyorlash, ikki davlat OАV vakillari ishtirokida malaka oshirish kurslari, treninglar, media-forumlar oʼtkazishga alohida eʼtibor qaratildi. 
Vazir Аtaulla Tarar shu yilning 5–6 fevralь kunlari Oʼzbekiston Prezidenti Shavkat Mirziyoevning Pokistonga amalga oshirgan davlat tashrifi sermahsul boʼlganini, mazkur tashrif strategik hamkorlik aloqalarini yanada jadallashtirishda muhim bosqich hisoblanishini taʼkidladi. 
«Pokiston Bosh vaziri Shahboz Sharifning Oʼzbekistonga va Oʼzbekiston Prezidenti Shavkat Mirziyoevning Pokistonga amalga oshirgan tashriflari yakunlariga bagʼishlangan maxsus hujjatli film yaratish ustida ishlayapmiz. Shuningdek, Zahiriddin Muhammad Bobur hayoti va ijodiga bagʼishlangan qisqa metrajli filmni yaratishga hamkorlikka tayyormiz. Filьm Boburning bolalik davri, ushbu mintaqaga kelishi va oʼz imperiyasiga asos solishi haqida boʼladi», – dedi federal vazir. 
Tomonlar Bobur faoliyatiga bagʼishlangan filmni hamkorlikda yaratishni boshlash maqsadida Oʼzbekiston Madaniyat vazirligi, Kinematografiya agentligi hamda Pokiston Аxborot va radioeshittirish federal vazirligi mutasaddilari oʼrtasida onlayn uchrashuv tashkil etishga kelishib oldilar.
 Shuningdek, Oʼzbekistonning iqtisodiy, investitsiyaviy va turizm salohiyati haqida turkum materiallar tayyorlash maqsadida birinchi bosqichda pokistonlik taniqli blogerlarni, ikkinchi bosqichda esa Pokiston telekompaniyalari, bosma va elektron nashrlari vakillarini oʼz ichiga oluvchi ijodiy delegatsiyani Oʼzbekistonga yuborish taklifi ham qoʼllab-quvvatlandi. 
Boʼlib oʼtgan uchrashuv yakunida, oʼzaro hamkorlikni rivojlantirish, koʼrib chiqilgan masalalari yuzasidan ikki tomonlama muloqotni davom ettirish va amaliy ishlarni kuchaytirishga kelishib olindi.