Bokuda O‘zbekiston, Ozarbayjon va Turkmaniston tashqi ishlar vazirlarining uch tomonlama uchrashuvi bo‘lib o‘tdi

15-oktabr kuni Boku shahrida O‘zbekiston Respublikasi tashqi ishlar vaziri Baxtiyor Saidov Ozarbayjon Respublikasi tashqi ishlar vaziri Jeyhun Bayramov hamda Turkmaniston Vazirlar Mahkamasi Raisi oʻrinbosari, tashqi ishlar vaziri Rashid Meredov bilan uch tomonlama uchrashuv oʻtkazdi. 

«Bugun Boku shahrida Ozarbayjon tashqi ishlar vaziri Jeyhun Bayramov hamda Turkmaniston Vazirlar Mahkamasi Raisi o‘rinbosari, tashqi ishlar vaziri Rashid Meredov bilan uch tomonlama uchrashuv o‘tkazdik, – deb yozdi O‘zbekiston TIV rahbari o‘zining telegram-kanalida. – Uchrashuvda O‘zbekiston, Ozarbayjon va Turkmaniston o‘rtasidagi do‘stlik va yaxshi qo‘shnichilik munosabatlarini yanada mustahkamlash, siyosiy muloqotni izchil rivojlantirish hamda savdo-iqtisodiy, transport-logistika va energetika sohalaridagi hamkorlikni kengaytirish masalalarini muhokama qildik.

Shuningdek, mintaqaviy transport yo‘laklarini rivojlantirish, tranzit salohiyatidan samarali foydalanish va o‘zaro manfaatli loyihalarni ilgari surish borasida fikr almashdik.

Mamlakatlarimiz o‘rtasidagi amaliy hamkorlikni yanada chuqurlashtirish, mavjud imkoniyatlardan to‘liq foydalanish va mintaqamizda barqarorlik hamda taraqqiyotni ta’minlash yo‘lida birgalikdagi sa’y-harakatlarni davom ettirish muhimligi ta’kidlandi».