Pokiston kompaniyasi Yangi Toshkentda yirik infratuzilma loyihasini amalga oshirishga qiziqish bildirdi

Oʼzbekiston elchisi Аlisher Toʼxtaev Pokistonning «Vision Group» kompaniyalar guruhi rahbariyati bilan muzokaralar oʼtkazdi.
Muloqot avvalida Pokiston tomoni Oʼzbekistonda Davlatimiz rahbari boshchiligida amalga oshirilayotgan islohotlar, xususan zamanoviy shaharlar, uy-joylar va infratuzilmalarni barpo etish boʼyicha tashabbuslar, «Yangi Toshkent» shahri loyihasi bilan batfsil tanishtirildi. Shuningdek, yurtimizga qurilish sohasiga sarmoya kiritayotgan xorijiy investorlarga taqdim etilayotgan imtiyoz va preferentsiyalar toʼgʼrisida aytib oʼtildi. 
Muzokaralar davomida mazkur kompaniyaning Yangi Toshkent hududida yirik loyihalarni amalga oshirish imkoniyatlari yuzasidan fikr almashildi.
Pokiston tomoniga Yangi Toshkent loyihasi doirasida davlat tomonidan infratuzilma va muhim ijtimoiy obʼektlarni barpo etishga katta mablagʼlar yoʼnaltirilayotgani, bugungi kunga qadar yangi shaharga 2 mlrd АQSh dollaridan ortiq investitsiya kiritilgani maʼlum qilindi.
Shu bilan birga, «Yangi Toshkent» uchun jami 20 ming gektar yer maydoni ajratilgani, birinchi bosqichda 6 ming gektar hududda 50 mlrd АQSh dollari qiymatidagi loyihalarni amalga oshirish koʼzda tutilgani taʼkidlandi.
«Vision Group» vakillari Yangi Toshkent loyihasini yuqori baholab, uni jozibador va istiqbolli investitsiya yoʼnalishi sifatida koʼrib chiqayotganini maʼlum qildi.
– Biz «Yangi Toshkent» hududida yirik investitsiya loyihasini amalga oshirishni rejalashtiryapmiz, – dedi kompaniya vakili. – Loyiha zamonaviy turar-joy binoalari, bogʼlar, sayilgohlar, favvoralar, umumiy ovqatlanish obʼektlari, savdo va koʼngilochar markazlar, shuningdek, aholi va xorijiy mehmonlar uchun qulay ijtimoiy va xizmat koʼrsatish infratuzilmasini qamrab oladi. 
Suhbat chogʼida, taklif etilayotgan mazkur loyiha taqdimotini oʼtkazish maqsadida kompaniyasi ishchi guruhining Oʼzbekistonga safarini tashkil qilish boʼyicha kelishildi. 
Tashrif davomida, shuningdek, kompaniya vakillari loyihani amalga oshirish imkoniyatlarini Oʼzbekistonning tegishli vazirlik va idoralari bilan muhokama qilali, hamkorlikning huquqiy, tashkiliy va moliyaviy parametrlarini oʼrganadi, loyihani joylashtirish uchun yer maydonlarini koʼzdan kechiradi.
«Vision Group» kompaniyalar guruhi 1990-yilda tashkil etilgan. Guruh koʼchmas mulk qurilishi va development, ommaviy axborot vositalari, kinoindustriya, farmatsevtika, taʼlim, arxitektura va dizayn sohalarida faoliyat yuritadi.
Soʼnggi 22-yil davomida guruh Pokistonning turli shaharlarida umumiy maydoni 2,6 ming gektar boʼlgan yirik shaharsozlik va qurilish loyihalarini amalga oshirgan. Bugungi kunda kompaniya aktivlari 7 mlrd. АQSh dollariga baholanmoqda.