Qishloq xo'jaligi texnikasi parki kengaytiriladi va agrar sohada zamonaviy raqamli yechimlar joriy etiladi

Prezident Shavkat Mirziyoyev qishloq xo'jaligini maxsus texnika bilan ta'minlash va sohaga raqamli texnologiyalarni keng joriy etish bo'yicha taqdimot bilan tanishdi.

Bugungi kunda qishloq xo'jaligida mexanizatsiyalash darajasi 81 foizni tashkil etadi. Xususan, so'nggi yillarda 1756 dona paxta terish mashinasi sotib olingan va paxta terimini mexanizatsiyalash darajasi 52 foizga yetgan. O'tgan mavsumda mashinalar yordamida 2,1 million tonna paxta terilgan. Buning natijasida so'nggi besh yilda qo'l mehnati 1,8 barobar qisqargan.

Navbatdagi vazifa – paxta terimida mashinalar ulushini kamida 70 foizga yetkazish. Buning uchun 2026 yilda 800 dona paxta terish mashinasi, shuningdek 6 ming dona ekish mashinalari, traktorlar va kombaynlar sotib olish rejlashtirilgan. Umuman, yil davomida 10 ming dona texnika sotib olinib, umumiy park 292 mingga yetkaziladi.

Yangi texnikani fermerlarga qulay lizing shartlarida taqdim etish uchun xalqaro moliya institutlaridan 400 million dollar jalb qilish rejalashtirilgan. Texnika milliy valyutada 18 foiz stavkada 10 yilgacha, ikki yillik imtiyozli davr bilan taqdim etiladi, kredit stavkasining 8 foizi byudjet hisobidan qoplanadi.

Taqdimotda qishloq xo'jalik mashinasozligini rivojlantirish, mahalliy ishlab chiqarish va xizmat ko'rsatishni kengaytirish ustuvor vazifalar ekanligi ta'kidlandi.

2026-2028 yillarda mahalliy texnika va agregatlar ishlab chiqarish hajmini 5 barobar oshirish, lokalizatsiya darajasini 10 foizga ko'tarish zaruriyati ko'rsatildi. Xususan, 2026 yilda ishlab chiqarish hajmini 6 ming donaga yetkazish, 2028 yilgacha o'zi yuruvchi texnika uchun lokalizatsiya ko'rsatkichini 30-35 foizga, osilma va tirqama texnika uchun 60-65 foizga yetkazish rejalashtirilgan.

Texnika va agregatlar sotib olishni subsidiyalashning amaldagi tizimi faqat lokalizatsiya darajasi 25 foizdan yuqori bo'lgan mashinalarga tatbiq etiladi. Eng ko'p talab qilinadigan uch turdagi import texnikasiga ham subsidiya joriy etish taklif qilindi. Umuman, texnika tannarxining 15 foizini qoplash uchun bu yil 660 milliard so'm ajratish ko'zda tutilgan.

Taqdimotda Toshkent traktor zavodini sog'lomlashtirish va faoliyatini qo'llab-quvvatlash choralari ham muhokama qilindi.

Zamonaviy bank xizmatlari ko'rsatish, raqamli texnologiyalar va sun'iy intellekt asosida yechimlarni joriy etish choralari taqdim etildi.

Agar 2025 yilda ATB "Agrobank" qishloq xo'jalik texnikasiga 1,6 trillion so'm kredit ajratgan bo'lsa, bu yil bu ko'rsatkichni 3,9 trillion so'mga yetkazish rejalashtirilgan. Kreditlash jarayonlarini avtomatlashtirish moliyalashtirish muddatini 3 kundan 3 soatga qisqartiradi.

Bundan tashqari, mijozlarga kompleks qishloq xo'jalik xizmatlari ko'rsatiladi. Har bir mintaqada bitta agroxizmat zonasi tashkil etilib, u yerda qishloq xo'jalik agenti ishlaydi. Ushbu zonalarda fermerlar bank va konsalting xizmatlarini olish, monitoring, tuproq tahlili, ko'chat yetkazib berish, agronom maslahati xizmatlaridan foydalanish hamda o'quv kurslari haqida ma'lumot olish imkoniyatiga ega bo'ladi.

Bankning chorvachiklik, bog'dorchilik va suv resurslarini "aqlli" boshqarishda sun'iy intellektdan foydalangan holda pilot loyihalarni amalga oshirish rejalari, shuningdek qishloq xo'jaligidagi startaplarni moliyalashtirish uchun 100 milliard so'm ustav kapitaliga ega yangi venchur kompaniya tashkil etish muhokama qilindi.

Takliflarni ma'qullab, davlatimiz rahbari mas'ul shaxslarga qishloq xo'jaligi mexanizatsiyasini yanada kengaytirish, mahalliy ishlab chiqarish va servisni rivojlantirish, shuningdek raqamli platformalar yordamida monitoring va moliyaviy xizmatlarni yaxshilash bo'yicha topshiriqlar berdi.