Yoshlar zamonaviy mehnat bozorida talab yuqori boʻlgan kasblarga oʻqitiladi

Prezident Shavkat Mirziyoyev Urganch shahridagi Xorazm ilgʻor kasbiy mahorat texnikumi hamda uning hududida tashkil etilgan Kasblar shaharchasi faoliyati bilan tanishdi.

Mamlakatimizda mehnat bozori talablariga mos, zamonaviy bilim va amaliy koʻnikmalarga ega oʻrta boʻgʻin mutaxassislarini tayyorlashga alohida eʼtibor qaratilmoqda. Bu borada kasbiy taʼlimni ish beruvchilar ehtiyoji bilan uygʻunlashtirish, ilgʻor xorijiy tajribani joriy etish va dual taʼlimni kengaytirish boʻyicha tizimli ishlar amalga oshirilmoqda.

Urganch shahrida tashkil etilgan Xorazm ilgʻor kasbiy mahorat texnikumi ana shu maqsadlarga xizmat qiladi. Muassasani barpo etish uchun davlat budjetidan 72,4 milliard soʻm ajratilgan. 5,2 gektar maydonda 1 ming 100 oʻringa moʻljallangan ikkita oʻquv binosi, 300 oʻrinli yotoqxona, sport zali, 200 oʻrinli oshxona hamda zamonaviy jihozlangan ikkita oʻquv ustaxonasi qurilgan.

Texnikumda Germaniya, Shveysariya, Buyuk Britaniya, Xitoy va Janubiy Koreyaning ilgʻor taʼlim dasturlari asosida oʻqitish yoʻlga qoʻyilgan. Dual taʼlim tizimi nazariy bilimlarni bevosita ishlab chiqarish amaliyoti bilan bogʻlash imkonini beradi.

2026-2027-oʻquv yili uchun 11 ta kasb yoʻnalishi boʻyicha 200 nafar iqtidorli yosh imtihon asosida saralab olingan. Taʼlim jarayoni ish beruvchilar bilan hamkorlikda tashkil etilib, bitiruvchilarning egallagan kasbi boʻyicha ish bilan taʼminlanishiga alohida eʼtibor qaratilmoqda.

Texnikum Xorazm viloyatidagi boshqa kasbiy taʼlim muassasalari uchun ham zamonaviy amaliy baza vazifasini oʻtaydi. Hududdagi taʼlim muassasalarining qariyb 4 ming 300 nafar oʻquvchisi bu yerdagi ustaxona va laboratoriyalarda amaliyot oʻtaydi. Bunday ilgʻor kasbiy mahorat texnikumlarini Qoraqalpogʻiston Respublikasi va boshqa hududlarda ham bosqichma-bosqich tashkil etish rejalashtirilgan.

Davlatimiz rahbari muassasa hududidagi Kasblar shaharchasini ham koʻzdan kechirdi. Bu yerda yoshlarning qiziqishi va qobiliyatini erta aniqlash, ularni muayyan kasblarga yoʻnaltirish uchun sharoit yaratilgan.

Kasblar shaharchasida “Oʻzing yasab koʻr” tamoyili asosida oʻquvchilar turli zamonaviy uskunalar bilan bevosita ishlab, amaliy koʻnikmalar hosil qiladi. Transport va logistika, sanoat va qurilish, servis, qishloq xoʻjaligi hamda “yashil” energetika kabi mehnat bozorida talab yuqori boʻlgan yoʻnalishlar qamrab olingan.

Majmua yirik ish beruvchi korxonalar bilan hamkorlikda faoliyat yuritadi. Bu yoshlarni kasbga yoʻnaltirishdan tortib, ularga amaliy koʻnikma berish va kelgusida bandligini taʼminlashgacha boʻlgan yagona tizimni shakllantirishga xizmat qiladi.

Prezidentimiz yoshlarni zamonaviy mehnat bozori talab qilayotgan kasblarga sifatli oʻqitish, taʼlim dasturlarini ish beruvchilar ehtiyojiga moslashtirib borish va bunday tajribani boshqa hududlarda ham kengaytirish muhimligini taʼkidladi.