Andijonda kichik GESlar uchun zamonaviy uskunalar ishlab chiqariladi

Prezident Shavkat Mirziyoyev Andijon tumanida kichik gidroelektr stansiyalari uchun zarur uskunalar ishlab chiqarish boʻyicha amalga oshirilayotgan loyiha bilan tanishdi.

Davlatimiz rahbarining 2025-yil 28-martdagi hududlarda mikrogidroelektr stansiyalari tarmogʻini rivojlantirishga doir qarori bu borada muhim asos boʻldi. Uning ijrosi doirasida “Andijon Jinlun yangi energiya” korxonasi tashkil etilmoqda.

Togʻli va suv resurslariga boy Markaziy Osiyo davlatlarida bunday uskunalarga talab yuqori. Biroq shu paytgacha mintaqada ularni sanoat miqyosida ishlab chiqaradigan ixtisoslashgan korxonalar yetarli emas edi. Yangi loyiha ana shu ehtiyojni qoplashga qaratilgan.

Andijon viloyatidagi mavjud suv manbalari “yashil” energetikani rivojlantirish uchun katta imkoniyat yaratadi. Xususan, Katta Fargʻona kanalining barqaror suv oqimi mikro va kichik GESlar qurish uchun qulay hisoblanadi.

Toʻliq xorijiy investitsiyalar hisobiga amalga oshirilayotgan loyihaning umumiy qiymati 20 million dollarni tashkil etadi. Korxona 2027-yilda toʻliq quvvat bilan ishga tushiriladi. Shundan soʻng bu yerda yiliga 70 milliard soʻmlik 100 ta kichik GES majmuasi, shuningdek, mikrogidroenergetika uskunalari, dastgoh va elektr jihozlari ishlab chiqariladi.

Bugungi kunda dunyoda ekologik toza va qayta tiklanuvchi energiya manbalariga talab ortib bormoqda. Bu jihatdan kichik va mikro GESlar samarali yechimlardan biri hisoblanadi. Ular atrof-muhitga taʼsiri kamligi, qisqa muddatda barpo etilishi va barqaror elektr energiyasi ishlab chiqarishi bilan ahamiyatlidir.

Loyiha doirasida 200 ta yangi ish oʻrni yaratiladi. Mahsulotlarni Qozogʻiston, Qirgʻiziston va Tojikistonga eksport qilish, yillik eksport hajmini 3 million dollarga yetkazish rejalashtirilgan.

Shuningdek, korxona Andijon viloyatida qator mikro GESlar qurishni moʻljallagan. Bu aholi va sanoat korxonalarini arzon, ekologik toza hamda barqaror elektr energiyasi bilan taʼminlashga xizmat qiladi.