Oʼzbekiston elchisi Pokiston TIV rahbarining oʼrinbosari bilan ikki tomonlama hamkorlikni rivojlantirishning istiqbolli yoʼnalishlarini muhokama qildi

Oʼzbekiston elchisi Аlisher Toʼxtaev Pokiston tashqi ishlar vazirining oʼrinbosari Bilol Haye bilan uchrashdi.

Muloqot avvalida Pokiston tomoniga Yangi Oʼzbekistonda barcha sohalarda amalga oshirilayotgan yangilanishlar toʼgʼrisida batafsil maʼlumot berildi.

Tomonlar Oʼzbekiston-Pokiston hamkorligining holati va uni yanada rivojlantirish istiqbollari xususida fikr almashdi.

Yuqori va oliy darajadagi siyosiy muloqotni faollashtirish, parlamentlararo hamkorlikni kengaytirish, savdo-iqtisodiy va sarmoyaviy sohalardagi oʼzaro aloqalarni diversifikatsiya qilish, shuningdek, madaniy-gumanitar hamkorlikni mustahkamlash masalalariga eʼtibor qaratildi.

Pokiston tashqi ishlar vazirining oʼrinbosari Oʼzbekiston-Pokiston munosabatlarining bugungi holatini yuqori baholab, barqaror siyosiy muloqot va oliy darajadagi ishonchli aloqalarni alohida qayd etdi. Savdo-iqtisodiy, transport, turizm va hududlararo hamkorlikni oʼz ichiga olgan deyarli barcha yoʼnalishlarda ijobiy surʼat kuzatilayotgani taʼkidlandi.

– Oʼzbekiston Prezidenti Shavkat Mirziyoev rahbarligida amalga oshirilayotgan islohotlar va erishilgan salmoqli natijalardan yaxshi xabardorman, – dedi Pokiston TIV rahbarining oʼrinbosari. – Shuningdek, Toshkent Islomobodning mintaqadagi asosiy hamkorlaridan biri hisoblanadi. Shu nuqtai nazardan, ikki tomonlama munosabatlarni yanada kengaytirish va koʼp qirrali tus berish uchun ulkan salohiyat mavjud. Oʼzbekiston Prezidenti tashabbusi bilan Islomobod shahrida barpo etilayotgan «Bobur bogʼi» xalqlarimizning mushtarak tarixi va doʼstligining oʼziga xos ramzi, shuningdek, Oʼzbekistonning Pokiston xalqiga qimmatli tuhfasi, deb bilaman.

Suhbat davomida ikki Davlat Rahbarlari tomonidan oʼzaro savdo hajmini 2 milliard АQSh dollariga yetkazish boʼyicha belgilangan vazifalarni amalga oshirish mexanizmlari koʼrib chiqildi.

Ushbu marraga yetishish uchun transport-logistika cheklovlarini bartaraf etish boʼyicha noanʼanaviy yechimlarni izlash va ikki mamlakat ishbilarmon doiralari hamkorligini yanada faollashtirish zarurligi taʼkidlandi.

Hududlararo hamkorlik masalalari ham muhokamalar markazida boʼldi. Pokiston tomoni joriy yilda Toshkent va Navoiy viloyatlari hamda Qoraqalpogʼiston rahbarlarining Pokistonga amalga oshirgan tashriflarini ijobiy baholadi.

Fuqarolarning oʼzaro safarlarini kengaytirish masalalari ham koʼrib chiqildi. Oʼzbekiston va Pokiston oʼrtasidagi toʼgʼridan-toʼgʼri aviaqatnovlar sonining 8 taga yetgani eʼtirof etilgan holda, kelgusida sayyohlar va tadbirkorlarning safarlarini yanada yengillashtirish maqsadida qoʼshimcha qatnovlarni ochish muhimligi qayd etildi.

Muzokaralar yakunida yuqoridagi yoʼnalishlarda hamkorlikni kengaytirish boʼyicha mavjud salohiyatni roʼyobga chiqarishga qaratilgan amaliy chora-tadbirlarni muhokama qilish maqsadida diplomatik muloqotni davom ettirishga kelishib olindi.