Elchi Аlisher Toʼxtaev: Savdo-iqtisodiy aloqalarni kengaytirish Pokiston–Oʼzbekiston muloqotining ustuvor yoʼnalishlarida biri

Pokistonning yetakchi «Pakistan In The World» jurnalida Oʼzbekiston elchisi Аlisher Toʼxtaev bilan intervyu eʼlon qilindi.

Intervyu jurnal muxbirining Pokistonni mamlakat sifatida, xalqini esa millat sifatida qanday baholaysiz, degan savoli bilan boshlangan.

 Oʼzbekiston elchisi Pokistonni ulkan geosiyosiy ahamiyatga ega, strategik joylashuvi, inson kapitali va boy madaniy merosi bilan ajralib turuvchi davlat sifatida bilishini, 250 milliondan ortiq aholiga ega ushbu mamlakat Janubiy Osiyodagi muhim iqtisodiy va siyosiy markazlardan biri hisoblanishini taʼkidlagan. «Men yurtingizni katta imkoniyatlar mamlakati, Pokistonning xalqini esa mehmondoʼst, jasur, bilimga chanqoq va oʼz qadriyatlariga sodiq millat sifatida baholayman. Аyniqsa, Pokiston xalqining Oʼzbekistonga nisbatan samimiy munosabati meni chuqur taʼsirlantirgan. Qaerga bormang, Samarqand, Buxoro, Imom Buxoriy, Bobur yoki Navoiy nomi tilga olinadi. Bu esa xalqlarimiz oʼrtasidagi maʼnaviy yaqinlik asrlar davomida saqlanib kelayotganini koʼrsatadi», – degan diplomat.

Shuningdek, intervyu davomida Oʼzbekiston va Pokiston oʼrtasidagi strategik sheriklikning holati va koʼp qirrali ikki tomonlama hamkorlikning ustuvor yoʼnalishlari xususida soʼz yuritilgan.

Xususan, soʼnggi yillarda Oʼzbekiston va Pokiston oʼrtasida oliy va yuqori darajada muntazam siyosiy muloqot faollashgani eʼtirof etilgan. Jumladan, Prezident Shavkat Mirziyoevning joriy yil 5–6 fevral kunlari Pokistonga amalga oshirgan davlat tashrifi tarixiy ahamiyat kasb etgani urgʼulangan. 

Elchining soʼzlariga koʼra, bugungi global noaniqliklar davrida jahon iqtisodiyoti jiddiy muammolarga duch kelmoqda. Bu holat savdo, iqtisodiyot, investitsiya va madaniy-gumanitar sohalarda xalqaro hamkorlikning rivojlanishiga salbiy taʼsir koʼrsatmoqda. Oʼzbekiston va Pokiston ham bu jarayondan mustasno emas.

Bunday sharoitda mamlakatlarimiz aholisini zarur oziq-ovqat mahsulotlari, dori vositalari va tibbiy buyumlar bilan uzluksiz taʼminlash masalalari ayniqsa dolzarbdir. Ishlab chiqarish va yetkazib berish zanjirlari, xalqaro va mintaqalararo transport va aloqa yoʼllari, avtomobilь va temir yoʼl transportida uzilishlar mavjudligini hisobga olib, mintaqada transport va tranzit yoʼnalishlarining diversifikatsiya qilingan tizimini shakllantirish boʼyicha harakatlarni faollashtirish muhimdir.

Shu bilan birga, intervyuda Oʼzbekiston va Pokiston oʼrtasidagi savdo-iqtisodiy aloqalarning holatiga toʼxtalib oʼtilgan. 

«Pokiston–Oʼzbekiston muloqotining ustuvor yoʼnalishlaridan biri sifatida savdo-iqtisodiy aloqalarni kengaytirish belgilangan, – degan diplomatik vakolatxona rahbari. – Tizimli saʼy-harakatlar natijasida soʼnggi sakkiz yilda ikki tomonlama savdo hajmi dinamik oʼsish surʼatlarini koʼrsatmoqda, uning umumiy hajmi deyarli 12 baravarga oshdi. 2026-yil 1-yanvar holatiga koʼra, ushbu koʼrsatkich 475 million АQSh dollarini tashkil etdi. Oliy darajadagi kelishuvlarga muvofiq, oʼzaro tovar ayirboshlash hajmini yaqin kelajakda 2 milliard dollarga yetkazish boʼyicha aniq maqsadlar belgilangan».

 Suhbatda Oʼzbekiston va Pokiston oʼrtasida oʼzaro savdoda eng qulay rejim oʼrnatilgani hamda «Imtiyozli savdo toʼgʼrisidagi bitim» imzolangani qayd etilgan. Ushbu bitim doirasida qator tovar pozitsiyalari uchun tarif imtiyozlari joriy etilgan. Tomonlar mazkur bitim doirasida tovarlar nomenklaturasini kengaytirish boʼyicha doimiy muloqot olib bormoqda.

Shuningdek, «Transafgʼon» uch tomonlama temir yoʼl loyihasining ahamiyati haqida soʼz yuritilgan.

«Transafgʼon temir yoʼli — nafaqat iqtisodiy, balki geostrategik ahamiyatga ega loyihadir. U Markaziy va Janubiy Osiyoni bogʼlaydigan yangi transport arteriyasi boʼlishi mumkin. Ushbu loyihaning toʼliq amalga oshirilishi barcha tomonlar uchun foydali. Oʼzbekiston bunday infratuzilmaviy loyihalarni mintaqaviy integratsiyaning asosiy ustuni deb biladi», – deya qayd etgan diplomatik missiyasi rahbari. 

Suhbatda Oʼzbekiston va Pokiston oʼrtasidagi turistlar almashinuvini oshirish boʼyicha koʼrilayotgan chora-tadbirlar haqida taʼkidlangan.

Oʼzbekiston elchisi, aytganidek, soʼnggi yillarda Oʼzbekiston Pokiston fuqarolari uchun viza tartibini sezilarli darajada yengillashtirdi. Bu esa ziyorat turizmi, tarixiy meros turizmi va oilaviy sayohatlar sonining oshishiga xizmat qildi. «Uzbekistan Airways» va «Centrum Air» tomonidan Oʼzbekiston va Pokiston oʼrtasida aviaqatnovlar soni haftasiga 6 taga yetkazildi: Toshkent–Lahor yoʼnalishida 4 ta, Islomobod–Toshkent yoʼnalishida 2 ta reys amalga oshirilmoqda. Yaqin kelajakda Toshkent–Karachi oʼrtasida ham parvozlarni yoʼlga qoʼyish rejalashtirilmoqda», – degan elchi Аlisher Toʼxtev.

Bundan tashqari, intervyu davomida muxbirning taʼlim, tibbiyot, farmatsevtika va maʼnaviy-maʼriy yoʼnalishdagi ikki tomonlama aloqalarni rivojlantirish istibollari hamda Аbu Rayhon Beruniy va Mirzo Gʼolib merosi birgalikda tadqiq etish imikoniyatlari xususidagi savollariga batafsil javob berilgan.