Oʻzbekiston Prezidentining Serbiyaga rasmiy tashrifi yakunlandi

Oʻzbekiston Respublikasi Prezidenti Shavkat Mirziyoyevning Serbiyaga rasmiy tashrifi yakunlandi.

Belgrad shahridagi Nikola Tesla nomidagi xalqaro aeroportda oliy martabali mehmonlarni Serbiya Respublikasi Prezidenti Aleksandr Vuchich va rafiqasi kuzatib qoʻydi.

Prezidentimizning Serbiyaga ilk rasmiy tashrifi ikki tomonlama munosabatlar tarixida yangi bosqichni boshlab berdi. Muzokaralar yakunlari boʻyicha davlat rahbarlari Strategik sheriklik munosabatlarini oʻrnatish toʻgʻrisidagi qoʻshma deklaratsiyani imzoladilar. Bundan tashqari, ustuvor yoʻnalishlarda erishilgan kelishuvlarni mustahkamlagan salmoqli hujjatlar toʻplami almashildi.

Mamlakatimiz yetakchisiga Serbiyaning oliy davlat mukofoti – Katta zanjirli Serbiya Respublikasi ordenini tantanali ravishda topshirish marosimi boʻlib oʻtdi.

Shuningdek, Belgrad koʻchalaridan biriga “Toshkent” nomi berildi.

Ishbilarmonlik dasturi doirasida ikki davlat rahbarlari qoʻshma biznes forumida ishtirok etdilar.

Rasmiy tashrif yakunlangach, Oʻzbekiston Prezidenti Toshkentga joʻnab ketdi.

Serbiya havo hududida oliy martabali mehmonning samolyotiga ushbu mamlakat Harbiy havo kuchlarining qiruvchi uchoqlari hamrohlik qildi.