Pokiston telekanalida o‘zbek futboli yutuqlariga bag‘ishlangan hujjatli film namoyish qilindi

Pokistonning “Discover Pakistan” davlat telekanalida “O‘zbek futboli: orzu, sabr va g‘urur tarixi” nomli hujjatli film namoyish etildi.

Pokistonlik tomoshabinlar mazkur film orqali futbol bo‘yicha O‘zbekiston milliy terma jamoasining jahon chempionatiga qay tariqa yo‘l olgani haqida boxabar bo‘ldi. Hujjatli asarda O‘zbekiston futboli tarixi, shakllanishi va taraqqiyoti keng yoritilgan.

Filmda o‘zbek futbolining XX asr boshidagi ilk o‘yinlaridan tortib, terma jamoaning jahon chempionatida ishtirok etishigacha bo‘lgan yo‘lni bosib o‘tgan kishilar haqida ham ko‘plab ma’lumotlar keltirilgan.

Kino loyihada qahramonlar sifatida taniqli o‘zbek sportchilari, hozirda O‘zbekiston milliy terma jamoasida o‘ynayotgan futbolchilar, murabbiylar, hakamlar va jurnalistlar ishtirok etgan.

Hujjatli film oxirida ta’kidlanganidek, O‘zbekiston futboli – bu shunchaki orzuning ro‘yobga chiqishi emas. Bu unga yillar davomida ishongan, umid bilan kurashgan va o‘z hissasini qo‘shgan avlodlarning munosib mukofotidir”.