O‘zbekiston tashqi ishlar vaziri Jazoir tog‘-kon sanoati vaziri bilan uchrashdi

6-oktabr kuni O‘zbekiston Respublikasi tashqi ishlar vaziri Baxtiyor Saidov Jazoir Xalq Demokratik Respublikasi tog‘-kon sanoati vaziri Murad Xanifi bilan uchrashdi.

«Jazoir Xalq Demokratik Respublikasi tog‘-kon sanoati vaziri janob Murad Xanifini O‘zbekiston zaminida ko‘rishdan mamnunmiz, – deb yozdi O‘zbekiston TIV rahbary o‘zining telegram-kanalida. – O‘zbekiston va Jazoir o‘rtasidagi munosabatlar barcha sohalarda izchil rivojlanib, yangi mazmun bilan boyib bormoqda. Joriy yil iyun oyida Jazoirga amalga oshirgan tashrifimiz doirasida janob Xanifi bilan uchrashib, hamkorlikning istiqbolli yo‘nalishlarini muhokama qilgan edik. Bugungi muloqotimiz o‘sha uchrashuvning mantiqiy davomi bo‘ldi.

Muzokaralarda mineral resurslarni geologik o‘rganish va istiqbolli konlarni o‘zlashtirish, qo‘shma loyihalarni amalga oshirish, xomashyoni chuqur qayta ishlash hamda yuqori qo‘shilgan qiymatli mahsulotlar ishlab chiqarish borasidagi hamkorlik istiqbollarini muhokama qildik».