Islomobod shahrida «Oʼzbekiston–Pokiston: doʼstlik va birodarlik navolari» nomli kontsert dasturi boʼlib oʼtdi

Pokiston Milliy sanʼat galereyasida Oʼzbekiston Respublikasi davlat mustaqilligining 35-yilligi munosabati bilan Islomobod shahrida oʼtkazilayotgan «Oʼzbekiston turizm kunlari» doirasida «Oʼzbekiston–Pokiston: doʼstlik va birodarlik navolari» nomli kontsert dasturi boʼlib oʼtdi.
Madaniy kechada Pokiston Milliy meros va madaniyat vaziri Аvrangzeb Xan Xichi, shuningdek, Pokiston Senati, Milliy assambleyasi va hukumati aʼzolari, Qurolli Kuchlar vakillari, diplomatik korpus, davlat va jamoat tashkilotlari, akademik muassasalar, ekspert-tahlil doiralari, ishbilarmonlar, ommaviy axborot vositalari vakillari, shuningdek, Pokistonda boʼlib turgan vatandoshlarimiz ishtirok etdi.
Tadbirni Oʼzbekiston elchisi Аlisher Toʼxtaev qutlov nutqi bilan ochib berdi. Elchi ikki Davlat Rahbarlarining qatʼiy siyosiy irodasi va izchil saʼy-harakatlari natijasida Oʼzbekiston–Pokiston munosabatlari strategik sheriklik darajasiga koʼtarilgani, siyosiy muloqot barqaror va tizimli tus olgani, mamlakatlar oʼrtasidagi koʼp qirrali hamkorlik yangi mazmun bilan boyib borayotganini qayd etdi.
«Oʼzbekiston va Pokiston oʼrtasidagi munosabatlar nafaqat siyosiy va iqtisodiy manfaatlar, balki xalqlarimizni bir-biriga bogʼlab turgan umumiy tarix, buyuk sivilizatsion meros, muqaddas qadamjolar, ilmiy-maʼrifiy anʼanalar va chuqur madaniy yaqinlikka tayanadi, – dedi diplomatik vakolatxona rahbari. – Oʼzbekiston Prezidenti Shavkat Mirziyoevning joriy yil 5–6 fevral kunlari Pokistonga amalga oshirgan davlat tashrifi yakunlari va tashrif doirasida erishilgan madaniyat sohasidagi kelishuvlar ikki tomonlama munosabatlarni sifat jihatidan yangi bosqichga olib chiqishga xizmat qilmoqda».
Pokiston milliy meros va madaniyat vaziri Аvrangzeb Xan Xichi Oʼzbekiston–Pokiston madainy munosabatlari oʼziga xos va noyob xususiyatga ega ekanini, ikki mamlakat xalqlari yuzlab yillik mushtarak tarix, madaniyat, ilm-fan va maʼnaviy qadriyatlar orqali chambarchas bogʼlanganini qayd etdi.
«Oʼzbekistonga tashrif buyurishdan doimo mamnunman. Xususan, joriy yil iyulь oyida yurtingizga amalga oshirgan tashrifim menda juda katta taassurot qoldirdi. Toshkent va Samarqandda boʼldim. Prezident Shavkat Mirziyoevning tashabbusi va gʼoyasi asosida Toshkent shahrida barpo etilgan Oʼzbekistondagi Islom sivilizatsiyasi markazi hamda Samarqand yaqinida qayta tiklangan buyuk muhaddis olim Imom Buxoriy majmuasi menda juda katta taassurot uygʼotdi. Bugun esa Oʼzbekiston madaniyat vakillarini Pokistonda qabul qilayotganimizdan xursandmiz. Madaniy-gumanitar hamkorlik Oʼzbekiston-Pokiston aloqalarining muhim yoʼnalishlaridan biridir. Oʼzbek va pokistonlik sanʼatkorlarning oʼzaro ijodiy safarlarini anʼana tusiga aylantirishimiz kerak», – dedi u.
Pokiston Milliy sanʼat galereyasi rahbari Аyub Jamali mamlakatimiz xalqini Oʼzbekiston Davlat mustaqilligining 35-yilligi bilan samimiy muborakbod etib, Islomobodda oʼzbek sanʼat ustalari ishtirokida «Oʼzbekiston–Pokiston: doʼstlik va birodarlik navolari» nomli kontsert dasturi tashkil etilgani ikki mamlakat oʼrtasidagi madaniy-gumanitar hamkorlik tobora kengayib borayotganining amaliy ifodasi ekanini taʼkidladi.
Oʼzbekistondan taklif etilgan Mudofaa vazirligi Аshula va raqs ansambli tomonidan taqdim etilgan kontser dasturida oʼzbek milliy, zamonaviy va vatanparvarlik mavzularidagi qoʼshiqlar, musiqa va raqslar ijro etildi.
Mamlakatimiz sanʼati ustalari tomonidan ijro etilgan ashula va raqslar pokistonlik sanʼat shinavandalari tomonidan olqishlar bilan kutib olindi. Madaniy kecha barchaga oʼzgacha kayfiyat baxsh etdi, ikki mamlakat madaniy anʼanalari mushtarakligini namoyish qildi.