O‘zbekiston tashqi ishlar vaziri Dohada Qatar Bosh vaziri oʻrinbosari va mudofaa ishlari boʻyicha davlat vaziri bilan uchrashdi

4-may kuni Doha shahrida O‘zbekiston Respublikasi tashqi ishlar vaziri Baxtiyor Saidov Qatar Davlati Bosh vaziri oʻrinbosari va mudofaa ishlari boʻyicha davlat vaziri Shayx Saud bin Abdurahmon Ol Soniy bilan uchrashuv o‘tkazdi.

«Qatar Davlati Bosh vaziri oʻrinbosari va mudofaa ishlari boʻyicha davlat vaziri Shayx Saud bin Abdurahmon Ol Soniy janoblari bilan mazmunli va samarali uchrashuv oʻtkazdik , – deb yozdi O‘zbekiston TIV rahbari o‘zining telegram-kanalida. –  Doha shahrida koʻrsatilgan mehmondoʻstlik uchun samimiy minnatdorlik bildirib, O‘zbekiston- Qatar munosabatlarining asosini tashkil etuvchi doʻstlik va oʻzaro ishonch ruhini yana bir bor taʼkidladik.

Uchrashuv davomida mintaqaviy va xalqaro vaziyat yuzasidan fikr almashdik, xususan, Yaqin Sharqdagi vaziyatga alohida eʼtibor qaratdik. Barqarorlikni ta’minlash va keskinlikni kamaytirishda vazminlik, muloqot hamda diplomatiyaning ahamiyatini taʼkidladik».