12-16-oktabr kunlari poytaxtimizda XI Toshkent xalqaro zamonaviy san’at biennalesi bo‘lib o‘tadi

Joriy yilning 12–16-oktabr kunlari O‘zbekiston poytaxtida «Voqealar gorizonti» mavzusidagi XI Toshkent xalqaro zamonaviy san’at biennalesi bo‘lib o‘tadi.

Xorijiy va mahalliy rassomlarning asarlari poytaxtning yetakchi muzey va galereyalarida namoyish etiladi. Dasturga Samarqandga tashrif ham kiritilgan. Bu oktabr oyida mamlakatimizga keladigan madaniy turizm ixlosmandlariga zamonaviy san’at va tarixiy meros bilan bir safarda tanishish imkonini beradi.

Biennale 2001-yildan buyon har ikki yilda bir marta o‘tkazib kelinadi. Bu yilgi mavzu insonning texnologik va madaniy o‘zgarishlar ostonasidagi holatiga bag‘ishlangan. Konsepsiyada qadimiy karvon yo‘llari chorrahasidagi Toshkent «oazis» – umid va yangi ma’no ramzi sifatida talqin etiladi.

Ochilish marosimi 12-oktabr kuni Markaziy ko‘rgazmalar zalida bo‘lib o‘tadi. Keyingi kunlarda Toshkent fotosuratlar uyi, Kamoliddin Behzod nomidagi Sharq miniatyura san’ati muzeyi, O‘zbekiston tasviriy san’at galereyasi va Ikuo Hirayama nomidagi Xalqaro madaniyat karvonsaroyida ko‘rgazmalar ochiladi. Dasturda performans, mahorat darslari, xalqaro ilmiy-amaliy konferensiya hamda mustaqillikning 35 yilligiga bag‘ishlangan «Charxpalak» ko‘rgazmasi ham bor. Biennale 16 oktabr kuni yakunlanadi.

2024-yil 14-18-oktabr kunlari bo‘lib o‘tgan X biennaleda 40 dan ortiq xorijiy ishtirokchilar ishtirok etdi. 

“Dunyo” AA