O‘zbekiston va Qozog‘iston yetakchilarining norasmiy uchrashuvi bo‘lib o‘tdi
O‘zbekiston Respublikasi Prezidenti Shavkat Mirziyoyev 29-mart kuni amaliy tashrif bilan Olmaota shahriga keldi.
Davlatimiz rahbarini Qozog‘iston Respublikasi Prezidenti Qasim-Jomart Toqayev kutib oldi. O‘zbekiston yetakchisi tashrifi sharafiga faxriy qorovul saflandi va ikki mamlakat bayroqlari ko‘tarildi.
* * * * * * *
O‘zbekiston Respublikasi Prezidenti Shavkat Mirziyoyev va Qozog‘iston Respublikasi Prezidenti Qasim-Jomart Toqayev Olmaota shahrida norasmiy uchrashuv o‘tkazdilar.
Ikki mamlakat delegatsiyalari ishtirokida O‘zbekiston-Qozog‘iston yaxshi qo‘shnichilik, strategik sheriklik va ittifoqchilik munosabatlarini izchil mustahkamlash masalalari atroflicha ko‘rib chiqildi.
Suhbat avvalida davlat rahbarlari bir-birini hamda qardosh xalqlarimizni bahor ayyomi Navro‘z va yaqinlashib kelayotgan Ramazon hayiti bilan samimiy qutladilar.
O‘zbekiston bilan Qozog‘iston o‘rtasidagi ko‘p qirrali hamkorlik yuksak darajaga ko‘tarilgani alohida mamnuniyat bilan qayd etildi. Barcha darajalarda faol muloqotlar olib borilmoqda. Tovar ayirboshlash hajmi yil boshidan buyon 14 foizga oshdi, umumiy qiymati 4 milliard dollardan ziyod investitsiya loyihalari portfeli shakllantirildi, yaqin hududlararo aloqalar va madaniy-gumanitar almashinuv rivojlanmoqda.
Davlat rahbarlari O‘zbekiston va Qozog‘iston Bosh vazirlari o‘rinbosarlarining o‘zaro savdoni ko‘paytirish, mashinasozlik, elektrotexnika, neft-gaz, to‘qimachilik, qishloq xo‘jaligi va boshqa ustuvor tarmoqlarda yetakchi korxonalarning kooperatsiya loyihalarini ilgari surish bo‘yicha ko‘rilayotgan chora-tadbirlar to‘g‘risidagi hisobotlarini tingladilar.
Prezidentlar sanoat kooperatsiyasi bo‘yicha uzoq muddatli dasturni shakllantirish, mintaqaviy ahamiyatga ega infratuzilmaviy loyihalarni jadallashtirish yuzasidan aniq topshiriqlar berdilar.
Joriy yilda Xalqaro sanoat kooperatsiyasi markazini ishga tushirish bo‘yicha amaliy ishlarni boshlash, qo‘shma tashqi savdo kompaniyasi faoliyatini kengaytirish muhimligi qayd etildi.
Mintaqaviy kun tartibi, shu jumladan yaqin oylarda O‘zbekistonda o‘tkaziladigan Markaziy Osiyo sammitlariga tayyorgarlik yuzasidan fikr almashildi.
Bo‘lajak ikki va ko‘p tomonlama tadbirlar rejasi ham ko‘rib chiqildi.
Uchrashuv har doimgidek do‘stona va ishchan ruhda o‘tdi.
* * * * * * *
O‘zbekiston Respublikasi Prezidenti Shavkat Mirziyoyev va Qozog‘iston Respublikasi Prezidenti Qasim-Jomart Toqayev "Medeu" tog‘-chang‘i klasteriga tashrif buyurdilar.
Davlatimiz rahbariga sel-suv toshqinlaridan himoya qilish maqsadida dengiz sathidan 1750 metr balandlikda barpo etilgan "Medeu" to‘g‘onining yaratilish tarixi va arxitekturaviy xususiyatlari haqida so‘zlab berildi.
“Medeu” to‘g‘onining tepasiga 842 pog‘onadan iborat "Salomatlik zinapoyasi" olib boradi. 2011-yilda to‘g‘on yonida "Shimbuloq" tog‘-chang‘i maskaniga eltuvchi 4,5 kilometr uzunlikdagi dor yo‘li qurilgan.
“Medeu” sport majmuasi 1972-yilda barpo etilgan bo‘lib, dengiz sathidan 1700 metr balandlikda joylashgan.
Majmua muz maydonining yuzasi 10,5 ming kvadrat metr bo‘lib, bir vaqtda 3 ming nafargacha kishini qabul qila oladi. Har yili unga 400 mingdan ortiq mehmon tashrif buyuradi.
Bugungi kunda majmua sport, turizm va madaniyat klasteri sifatida faoliyat yuritmoqda. Sport musobaqalari, ommaviy konki uchish, madaniy tadbirlar, festivallar muntazam o‘tkazib kelinmoqda.
2011-yilda bu yerda VII qishki Osiyo o‘yinlari, 2017-yilda Butunjahon Universiada musobaqalari o‘tkazilgan.
Tanishuv chog‘ida O‘zbekiston va Qozog‘iston Prezidentlari yosh figurali uchuvchilarning ko‘rgazmali chiqishlarini tomosha qildilar.
* * * * * * *
O‘zbekiston Respublikasi Prezidenti Shavkat Mirziyoyev va Qozog‘iston Respublikasi Prezidenti Qasim-Jomart Toqayev birgalikda "AlmatyFair.ai" raqamli texnologiyalar va sun’iy intellekt ko‘rgazmasiga tashrif buyurdilar.
Davlat rahbarlariga mazkur sohalardagi ilg‘or yechimlar va innovatsion ishlanmalar haqida axborot berildi.
Qozog‘iston Prezidenti tashabbusi bilan tashkil etilayotgan "Alem.ai" sun’iy intellekt markazining taqdimoti bo‘lib o‘tdi.
Alem.ai - sun’iy intellekt sohasida mutaxassislarni o‘qitish, startaplarni ishga tushirish va ilmiy tadqiqotlarni amalga oshirish uchun platforma.
Yetakchilar Markaziy Osiyodagi eng yirik texnoparklar birlashmasi - "Central Asian Innovation Hubs" ("Astana Hub" va "IT Park Uzbekistan") faoliyati bilan ham tanishdilar.
Prezidentlar raqamlashtirish sohasidagi o‘zaro manfaatli hamkorlikni kengaytirish, qo‘shma IT mahsulotlarini yaratish, sun’iy intellekt va ilg‘or axborot texnologiyalari sohasidagi milliy strategiyalarni o‘zaro bog‘lash muhimligini ta’kidladilar.
* * * * * * *
O‘zbekiston Respublikasi Prezidenti Shavkat Mirziyoyev Olmaota shahriga tashrifning madaniy dasturi doirasida Qozog‘iston Respublikasi Prezidenti Qasim-Jomart Toqayev bilan birgalikda Abilxon Kasteev nomidagi Milliy san’at muzeyiga tashrif buyurdi.
Xalq rassomlari – qozoq tasviriy san’ati asoschisi Abilxon Kasteev va o‘zbek rangtasvir ustasi O‘rol Tansiqboyev asarlari ko‘zdan kechirildi.
Ko‘rgazma O‘zbekiston va Qozog‘iston boy badiiy merosining yorqin ifodasi, ikki qardosh xalq o‘rtasidagi mustahkam madaniy aloqalarning ramzi bo‘ldi.
Davlat rahbarlari san’at sohasidagi hamkorlikni yanada kengaytirish, shu jumladan qo‘shma tadbirlar o‘tkazish, madaniy muloqotni rivojlantirishga xizmat qiladigan tashabbuslarni qo‘llab-quvvatlash muhimligini ta’kidladilar.
* * * * * * *
O‘zbekiston Respublikasi Prezidentining Qozog‘iston Respublikasiga amaliy tashrifi yakunlandi.
Oliy darajadagi tadbirlar dasturi doirasida Olmaota shahrida Prezident Shavkat Mirziyoyev va Prezident Qasim-Jomart Toqayev norasmiy uchrashuv o‘tkazib, ikki tomonlama, xalqaro va mintaqaviy ahamiyatga molik dolzarb masalalarni muhokama qildilar.
Yetakchilar "Medeu" tog‘-chang‘i klasteri faoliyati bilan tanishdilar, raqamli va sun’iy intellekt texnologiyalari, ikki mamlakat atoqli musavvirlarining rangtasvir va grafika asarlari ko‘rgazmalarini ko‘zdan kechirdilar.
Olmaota xalqaro aeroportida O‘zbekiston Respublikasi Prezidenti Shavkat Mirziyoyevni Qozog‘iston Respublikasi Prezidenti Qasim-Jomart Toqayev kuzatib qo‘ydi.
Davlatimiz rahbari Toshkentga jo‘nab ketdi.
O‘zbekiston Respublikasi Prezidentining rasmiy veb-sayti
